L'Iberismu

Los pueblos ibéricos caminaron xuntos dende siempres, con una hestoria dacuando de mancomún, dacuando en paralelu.

Dende la romana Hispania, pasando pol reinu visigodu o la presencia árabe, la unidá foi una constante. Con la Reconquista esta unidá estázase, y cada pueblu escurre autónomamente; a pesar d'ello, la visión de la unidá ibérica siempres tuvo presente, y prueba d'ello ye la política d'aliances matrimoniales. Con Felipe de Habsburgu esta unidá materialízase, axuntando so una mesma corona les Españes y Portugal. Pero en 1640, por distintos motivos, vuelven dixebrase los sos destinos.

Y llegamos al sieglu XIX, cuando surde'l Iberismu como tal; un movimientu que buscaba emular los ésitos de la Unificación alemana o'l Risorgimento italianu. Dende les Cortes de Cádiz (les cortes constituyentes españoles mientres la invasión napoleónica), intentóse una alianza lliberal con Portugal, xuniendo fuerces pa lluchar contra l'absolutismu y l'Antiguu Réxime. Y en la segunda metá del sieglu, esti iberismu adquier un calter progresista, federal y republicanu.

Col Ultimátum Británicu de 1890 contra'l colonialismu portugués, o col llamáu Desastre de 1898, y la perda de les últimes colonies españoles, surden nueves voces que clamen pola unión ibérica, sobremanera dende'l nacionalismu periférico, pa reconducir el debalu peninsular. A estes voces xúnese, por casu, la de Miguel de Unamuno o Teófilo Braga..

Y asina atopamos que, inclusive la Constitución de la II República Española reconocía la doble nacionalidad hispano-portuguesa. O que Francesc Macià proclamó "l'Estat Català integrat en la federació de Repúbliques Ibèriques". Dempués vinieron dictadures fascistes a un llau y otru, y por fin la democracia, anque nel casu portugués, de manera muncho más digna. Y en 1986 incorpórense dambos estaos nel proyectu européu.

Nesti nuevu escenariu ye onde más sentíu tien completar esti suañu llamáu Iberia. Crear un proyectu fuerte dientro d'Europa, capaz de xugar un papel na comunidá internacional, dafechu democráticu y federal, que resuelva por fin les dinámiques centrípetes y centrífugues, onde se respeten les nueses llingües, cultures, hestoria ya identidaes; a última hora, onde toos teamos a gustu.

«Nun van ser les voluntaes de los homes sinón les lleis de la Hestoria les que van alteriar l'actual estructura de la Península Ibérica. La meyor forma de producise esa evolución va ser dientro d'una Europa xunida».

Agustí Calvet, Gaziel. (1887-1964)