Agustí Calvet, 'Gaziel'

Agustí Calvet Pascual (Sant Feliu de Guíxols, Girona, 7 d'ochobre de 1887 – † Barcelona, 1964) foi un escritor y periodista catalán, conocíu sol pseudónimu de Gaziel. Nació nel senu d'una familia burguesa qu'emigró a Barcelona cuando él yera entá un neñu, magar lo cual siempres caltuvóse en contactu cola so localidá natal. En 1903 empezó la carrera de Derechu na Universidá de Barcelona, impulsáu pol deséu paternu de que ganara una notaría. Más tarde matriculóse na Facultá de Lletres, la so verdadera vocación. Vivió unos meses en Madrid, onde se doctoró en 1908. Ellí tuvo la oportunidá de tratar a diverses figures de la dómina, como Bonilla y San Martín –el so queríu maestru–, Ramón y Cajal, Luis Simarro, Unamuno, Galdós y Valle-Inclán.

Empecipió la so carrera periodística en La Veu de Catalunya, la revista de la Lliga Regionalista. En 1911 empezó a trabayar nel Institut d'Estudis Catalans, fundáu poco antes por Prat de la Riba. Na capital francesa, onde se treslladara p'afondar les sos conocencies, vivió l'españíu de la Gran Guerra, sobre lo cual dio bona cuenta nes sos cróniques pa La Veu. Estos trabayos nun gustaron a Prat de la Riba (que dirixía La Veu) y sí, sicasí, a Miquel dels Sants Oliver, que daquella yera inda collaborador col periódicu de la Lliga. Esto llevó a Gaziel a incorporase a La Vanguardia pa escribir sobre'l París de la Primer Guerra Mundial. Los sos cróniques sobre la guerra fueron bien lleíes en toa España y consagráron-y como periodista. Dende entós y hasta 1953, utilizó casi puramente'l castellán, lo que-y valió non poques crítiques per parte de los sectores más catalanistes. Nel diariu barcelonés, que mientres la República aportó a unu de los que tenía más tirada de toa España, trescurrió bona parte de la so carrera periodística ya inclusive llegó a dirixir el diariu ente 1920 y 1936. Nesa dómina convertióse nel periodista políticu más almiráu y nel líder d'opinión de la burguesía lliberal y democrático, que yera'l públicu natural de La Vanguardia.

Al españar la Guerra Civil, exilióse. So ye la frase: "Si de la República han de tar ausentes les dereches, cuando manden les esquierdes, y depués, cuando son les dereches les que gobiernen, les esquierdes han d'alloriar y llanzase a la revolución, nun va haber, nun hubo inda, verdadera democracia n'España. Como tantes otres coses, la democracia equí nun ye más qu'un nome de raigaños clásicos y de conteníu estranxero". Tornó a España en 1940, apuráu pol'avance nazi n'Europa. Foi procesáu y absueltu poles autoridaes franquistes. Establecióse en Madrid, y empezó a escribir en catalán llibros de memories y de viaxes. Yá septuaxenariu, tornó a Barcelona onde retomó con entusiasmu la escritura na so llingua materna, tratando de reconciliase col catalanismu de la so mocedá.

Republicanu íntegru y de talante moderao, laicu y demócrata, amigu de la so tierra y la so llingua, más federalista que nacionalista, morrió a la edá de 77 años y dexó un legáu lliterariu formáu por ocho llibros en castellán y catorce en catalán. Josep Benet, nel prólogu a la Obra Catalana Completa (1970) que publicó póstumamente la Editorial Selecta, valoró asina la so contribución: «Probablemente foi l'escritor políticu más intelixente que dio la derecha catalana nesti sieglu». Pa munchos ye consideráu'l primer periodista "modernu" del estáu español, y el primeru en dar una óptica internacional a los sos escritos.

Ye autor de la frase: «Nun van ser les voluntaes de los homes sinón les lleis de la Hestoria les que van alteriar l'actual estructura de la Península Ibérica; la meyor forma de producise esa evolución va ser dientro d'una Europa xunida».

Pessoa y la civilización ibérica

"Na península hispánica, d'un llau a otru, nós nun somos llatinos, somos ibéricos. Ye precisu basase nesto, primero que en cualesquier otra cosa. Nada tenemos de mancomún, psicolóxicamente, colos dos países herederos de la civilización llatina puramente dicha — Italia y Francia. Nós nun somos llatinos, somos ibéricos. Tenemos — españoles y portugueses — una mentalidá a parte del restu d'Europa. Por más diferencies que nos dixebren ( y éstes verdaderamente esisten) tamos más próximos psíquicamente los unos de los otros, de lo que cualesquier de nós de cualesquier otru pueblo extra-ibéricu. Dixéronse coses como que nós los portugueses somos más paecíos a los franceses, o a los italianos, que a los españoles; felizmente nun ye verdá".

(Compilación de testos pa la película "Mensagem")

"Nós, ibéricos, somos un encruz de dos civilizaciones — la romana y l'árabe. En Francia y n'Alemaña la civilización romana esiste superpuesta al fondu orixinal, ensin otru influxu *civilizacional. Somos, por eso, mas complexos y fecundos, por naturaleza, que Francia o Alemaña, [...]"

("Problema Ibérico")

"Iberia
Separaos, vamos tener, cada unu de nós, un sentíu nacional;nun tenemos sentíu civilizacional. Vamos poder esistir más o menos digna y decentemente, como cualesquier Bélxica o cualesquier Suiza, pero eso nun ye esistencia digna a la que pueda aspirase. Valimos más qu'eso; tenemos derechu a faer más qu'esistir."

("Sentido nacional e sentido civilizacional: a Civilização Ibérica")

"Si somos ibéricos, tenemos derechu a esperar que tou tien de tender escontra una política ibérica, escontra una civilización ibérica que, común a los países que componen Iberia, a toos, sicasí, tescienda (tescienda a cada unu d'ellos individualmente).

("A síntese cultural ibérica")

"Puestu, pos, que tien de tendese escontra dalguna unidá ibérica, coles mesmes establezse qu'esa unidá tien de tar constituyida por pueblos lo más diverxentes posible dientro d'esa unidá. Sume por tanto, por absurda, por ibéricamente criminal, tola tentativa que quiera esbozase d'absorción d'un país por otru, como criminal resulta, tamién poro, l'absorción (ficticia, de fechu) de la nación catalana per Castiella. Porque llegamos finalmente a la visión integral de la confederación ibérica".

("Problema Ibérico")

Presentación de la Llei del occitano

El pasáu día 9 de noviembre tuvo llugar na see del Institut d'Estudis Catalans la presentación de "Llei del occitanu, aranés en Arán", aprobada'l 22 de septiembre de 2010.

Nel actu, amás del presidente de l'IEC, el sociólogou Salvador Giner, y Enric Garriga Trullols, presidente del CAOC (Centre d'Agermanament Occitano-Català), intervinieron dellos ponentes de la llei (les diputaes Carme Vidal -CDC- y Maria Àngels Cabasés -ERC-, y el diputáu Francesc Pané -ICV), el Síndic del Conselh Generau d'Aran, Paco Boya, y Josep-Lluís Carod-Rovira, vicepresidente de la Generalitat de Catalunya.

Esta llei supon una meyora sustancial na reconociencia de la identidá aranesa y occitana, y el so autogobierno, una y bones la Vall d'Aran conviértese asina nel primer y únicu territoriu de Occitania onde la llingua occitana, llamada equí aranés, consigue la oficialidá. Asitíase asina Arán na centralidad de la comunidá occitana, y supon un exemplu, un referente y una esperanza pal restu de territorios. El territoriu más pequenu de Occitania, y col menor númberu de falantes, dio'l pasu más importante en favor de la so llingua y cultura. Amás, potencia los llazos y el compromisu entre Catalunya y Occitania, en contactu dende la dómina medieval y que güei día, nel contestu européu, traducense n'intereses económicos y culturales de gran importancia.

Fortalezse l'idioma y dótase-y de los mecanismos necesarios, non solo pa la so supervivencia, sinón pa la so su recuperación. Créanse preseos como una plataforma audiovisual de televisión por Internet, Hèm TV, o'l Institut d'Estudis Aranesi, que va velar pola llingua, cultura ya identidá araneses, según garantizar la unidá de la llingua occitana; pero lo más importante ye la prioridá que se-y da a la educación.

Supon una reblagada al frente, cuidao que, con unos 6.000 falantes, la oficialidá non se circunscribe namá a la Vall d'Aran, sinón qu'inclúi toa Catalunya, pasando asina a ser la tercera llingua oficial en tol territoriu, garantizandose asina'l respetu por toes elles.

Catalunya conviértese asina nel único territoriu de la UE, xuntu con Luxemburgu, que tien tres llingües como oficiales; ye una llección de respetu, implicación, sensibilidá y valentía, una actitú bien distinta a la d'otros territorios, onde non yá una única llingua puede gociar de respetu y oficialidá, sinón que s'intenta minorizar a les demás.

Como dixo Francesc Pané, nun pasaría nada si sume una camparina, queden munches otres camparines; nin si sumen toles camparines, entá habríen munchos otros animales; pero un mundu ensin camparines fadríanos muncho más probes a toos. Una llingua ye una manera d'esplicar el mundu, una cosmovisión, una alma. Que cada selmana muerran dos llingües nel mundu, empobreznos...

Sinibald de Mas

Introduzco equí a una de les grandes figures de l'Iberismu: Sinibald de Mas i Sans (1809-1868). Sinólogu, pintor, calígrafu, escritor, embaxador, aventureru ya intelectual iberista español, y unos de los pioneros de la fotografía.

Discípulu de Pablo Alabern en Barcelona, presentó a les Cortes en 1821 unes pruebes práctiques de caligrafía. Estudió idiomes, de los que llegó a conocer unos veinti, según tamién física. Tradució l'Eneida de Virxíliu n'hexámetros castellanos. Foi un bon pintor; caltiénense les sos semeyes de Manuel de Cabanyes y de Joaquim Roca i Cornet, realizaos escontra 1830. En 1831 publicó en Barcelona Veinticuatro poemas líricos y Aristodemo, una traxedia en versu na qu'intentó exercer un interesante y peculiar sistema de métrica, que describió nel so ensayu Sistema musical de la lengua castellana (Barcelona, 1832). Tamién inventó un idioma universal. Protexíu por Remisa, collaboró n'El Vapor hasta mediaos de 1834. Encamentáu por Félix Torres Amat llogró la protección de Cea Bermúdez, Francisco Martínez de la Rosa y Javier de Burgos por que se-y nomara traductor encargáu de viaxar pol Oriente con comisión de recoyer notícies y documentos literarios y estadísticos, de política, comerciu y de too xéneru que pudieren importar a los intereses y glorias nacionales.

La so aventura viaxera, empecipiada en 1834, llevólu de Marsella a Constantinopla, onde contraxo amistá col ilustráu orientalista López de Córdoba, y hasta 1838 en que llegó a Calcuta, pasó pol Llíbano, Palestina, Exiptu, Arabia y Persia. En Bengala fixo dalgunos de los primeres darregotipos conocíos de la rexón. Como la so paga tardaba en venir, instalóse en Manila, viviendo de la so habilidá como retratista y de la caridá del padre Manuel Bueno, que-y tuvo agospiáu na so celda cinco meses. A la so vuelta a Madrid en 1842 publicó Informe sobre el estado de las islas Filipinas, primero n'edición confidencial de 1842 y después en pública, en 1843; como defendía la independencia del archipiélagu, él mesmu censuró la parte que nun-y gustó al gobiernu. Establecú en Macao en 1844, publicó L'Ideographie, 1844, y en Manila el so Pot-pourri lliterariu (1845), dedicáu a Torres Amat. Collaboró en El Renacimiento de Madrid (1847). Nesi mesmu añu foi designáu como primer embaxador español en China; llegara a ella per vegada primera cuando tenía 34 años. Llogró la representación y see diplomática en Pekín cuando namá Francia, Gran Bretaña y EE. UU. conseguieren la acreditación del emperador manchú, bien ronciegu a la penetración occidental, y el so amigu José de Aguilar, quien llegaría a ser tamién un gran sinólogu, llogró'l consuláu de Hong Kong en 1848 con residencia en Macao.

Vueltu a Madrid en 1851, ente les sos obres d'ensayu políticu destaca, al calor del movimientu pro "Unión Ibérica", La Iberia. Memoria sobre la conveniencia de la unión pacífica y legal de Portugal y España. Esta obra foi publicada por primer veegada en Lisboa en 1851; Latino Coelho traducíu-la al portugués en 1852. Foi ben reimpresa tantu nesta mesma ciudá como en Madrid. La obra intentaba, según Rocamora, demostrar "les ventayas polítiques, económiques y sociales de la unión de los dos monarquíes peninsulares nuna sola nación". Puede considerarse-y como manifestación de los intereses económicos de la burguesía peninsular, que, en competencia con Francia ya Inglaterra, quería ampliar el so mercado. L'escudu de la nueva nación yera'l de España y Portugal xuníos, y la bandera constaba de cuatro colories: blancu, azul, colloráu y mariellu. En 1853 reimprimióse en Madrid coles mesmes que les sos Obras literarias. Foi condecoráu cola Orde de Carlos III.

De Mas escribió tamién L'Angleterre, la Chine et l'Inde, París, 1857, y La Chine et les puissances chrétiennes, París, 1861, llibros bien documentaos qu'encamienten aumentar el comerciu y estremar China pa la so meyor esplotación comercial pelos países europeos. Volviendo a la so afición pola caligrafía, publicó en París Cartilla, 1858 y, en collaboración con Jerónimo Canals, Arte de escribir en letra española, 1860; con W. Norriat escribió Arte de escribir letra inglesa, 1860. Manuel Ovilo y Otero escribe tamién que ye autor de Colección de despachos diplomáticos. Son les sos comunicaciones empobinaes al gobiernu. La primera trata sobre Grecia; otra sobre Suez; otra de Moka; otra de Calcuta. Tamién d'una Noticia estadística y mercantil de Shanghay, de Ningpó, de Intérprete del viajero en Oriente, de Estado de las islas Filipinas, 1845 y de Memoria sobre las rentas públicas de Filipinas y los medios de aumentarlas.

L'Iberismu

Los pueblos ibéricos caminaron xuntos dende siempres, con una hestoria dacuando de mancomún, dacuando en paralelu.

Dende la romana Hispania, pasando pol reinu visigodu o la presencia árabe, la unidá foi una constante. Con la Reconquista esta unidá estázase, y cada pueblu escurre autónomamente; a pesar d'ello, la visión de la unidá ibérica siempres tuvo presente, y prueba d'ello ye la política d'aliances matrimoniales. Con Felipe de Habsburgu esta unidá materialízase, axuntando so una mesma corona les Españes y Portugal. Pero en 1640, por distintos motivos, vuelven dixebrase los sos destinos.

Y llegamos al sieglu XIX, cuando surde'l Iberismu como tal; un movimientu que buscaba emular los ésitos de la Unificación alemana o'l Risorgimento italianu. Dende les Cortes de Cádiz (les cortes constituyentes españoles mientres la invasión napoleónica), intentóse una alianza lliberal con Portugal, xuniendo fuerces pa lluchar contra l'absolutismu y l'Antiguu Réxime. Y en la segunda metá del sieglu, esti iberismu adquier un calter progresista, federal y republicanu.

Col Ultimátum Británicu de 1890 contra'l colonialismu portugués, o col llamáu Desastre de 1898, y la perda de les últimes colonies españoles, surden nueves voces que clamen pola unión ibérica, sobremanera dende'l nacionalismu periférico, pa reconducir el debalu peninsular. A estes voces xúnese, por casu, la de Miguel de Unamuno o Teófilo Braga..

Y asina atopamos que, inclusive la Constitución de la II República Española reconocía la doble nacionalidad hispano-portuguesa. O que Francesc Macià proclamó "l'Estat Català integrat en la federació de Repúbliques Ibèriques". Dempués vinieron dictadures fascistes a un llau y otru, y por fin la democracia, anque nel casu portugués, de manera muncho más digna. Y en 1986 incorpórense dambos estaos nel proyectu européu.

Nesti nuevu escenariu ye onde más sentíu tien completar esti suañu llamáu Iberia. Crear un proyectu fuerte dientro d'Europa, capaz de xugar un papel na comunidá internacional, dafechu democráticu y federal, que resuelva por fin les dinámiques centrípetes y centrífugues, onde se respeten les nueses llingües, cultures, hestoria ya identidaes; a última hora, onde toos teamos a gustu.

«Nun van ser les voluntaes de los homes sinón les lleis de la Hestoria les que van alteriar l'actual estructura de la Península Ibérica. La meyor forma de producise esa evolución va ser dientro d'una Europa xunida».

Agustí Calvet, Gaziel. (1887-1964)