Teófilo Braga y la construcción ibérica

Teófilo Braga, presidente que foi del gobiernu provisional de la República de Portugal, escribía antes de proclamase la República nel so país, a cuenta de una posible unión d'España y Portugal:

"Si la República na Península hispánica quier tener un destín firme y progresivo va tener que siguir los enclinos separatistes, que son inmortales, cola forma disciplinada d'un pactu federativu, reconstituyendo l'autonomía d'estos pequeños Estaos de la Edá Media. Cuando la República estremaría España nos Estaos autónomos de Galicia Asturies, Vizcaya, Navarra, Cataluña, Aragón, Valencia, Murcia, Granada, Andalucía, Estremadura, Castiella la Nueva, Castiella la Vieya y Llión, entós solamente Portugal va poder constituyir con ella una Federación, teniendo asegurada la so independencia contra toa anexón ibérica entós solamente va poder constituyir, ensin torgues, el Pactu Federal de los Estaos llibres peninsulares ya ibéricos. Lo contrario ye un absurdu, una violencia, que nun se fadrá ensin vertir sangre, y que'l so resultancia veríase destruyíu poco tiempu dempués, como lo foi en 1640."

Y dirixiéndose a los republicanos españoles, Teófilo Braga añedía:

"El réxime republicanu mientres los dos países se gobiernen por sigo mesmos, nun puede, ensin viciar la so esencia, atacar el principiu de les autonomíes nacionales. Gracies a la República, España va ser desafiada, d'esti unitarismo políticu que la afuega; una nueva cazumbre va circular ente les distintes partes que componen esti país; les sos enerxíes heróiques, les sos capacidaes artístiques y científiques van atopar un nuevu aliciente. Lo mesmo Portugal, atrofiáu por sesenta años d'un lliberalismu bastardu, va ver surdir nel réxime republicanu los sos nuevos homes que van tener conciencia d'enllenar una misión social. Los dos países confederaos van formar una potencia europea, verdaderu puntu de sofitu de la Confederación Llatina o occidental, la Federación Ibérica, teniendo como propósitu una acción común, va tener una gran influencia internacional sol triple puntu de vista científicu, económicu y xurídicu.

Ye un fechu indiscutible que mientres los últimos trenta años, el movimientu de secesión en Cataluña —el Portugal del Este— tomó gran medría. Paecía que cola República, esti separatismu latente quedaría esmorecíu, una y bones la República cabía esperar que fuera federal. Mas la non alteración de les bases del Estáu dio, otra manera, nueves brengues al separatismu catalán. Sería risible pretender qu'esti movimientu ye artificial. Non. Respuende a una realidá histórica. El separatismu ye la respuesta qu'embaxo se da al Estáu cesarista, al Estáu unitariu y xendarme. Les razones que va trés sieglos determinaron la separación de Portugal y l'insurrección de Cataluña van faer que mañana, si la política española nun sufre un tresformamientu radical, Cataluña dixébrese y dempués Vasconia, Galicia, les Baleares...
La nación respuende a un procesu históricu necesariu. Primero que el mundu faiga la so unidá definitiva, primero que suman dafechu les fronteres gran idea socialista—, la nación ye un pasu, una parte d'esi grandiosu movimientu d'integración nel espaciu y nel tiempu. Pero lo que nun tien razón de ser, lo que se funde inevitablemente nun momentu de crisis, ye toa estructuración artificial opuesta al aldu progresivu de la Hestoria. Desfíxose l'Imperiu austru-húngaru; quedó estazáu pola guerra porque ellí tamién, como n'España, l'Estáu faía imposible la llibre coordinación nacional. A España que, d'últimes ye lo que queda d'un vieyu imperiu, ta-y acutáu un fin asemeyáu, siguiendo'l procesu d'esbarrumbamientu, si nun s'esmagaya l'Estáu pa faer sobre les sos ruines una estructuración enfocada escontra alantre y non escontra tras, como asocede agora.
L'aspiración d'un español revolucionariu nun hai de ser qu'un día, quiciabes non alloñáu, siguiendo'l so impulsu actual, la Península Ibérica quede convertida nun mosaicu balcánicu en rivalidaes y lluches armaes fomentaes pol imperialismu estranxeru, sinón que, otra manera, tien de tender a buscar la llibre y bonal reincoproración de Portugal a la gran unidá ibérica”…

Agustí Calvet, 'Gaziel'

Agustí Calvet Pascual (Sant Feliu de Guíxols, Girona, 7 d'ochobre de 1887 – † Barcelona, 1964) foi un escritor y periodista catalán, conocíu sol pseudónimu de Gaziel. Nació nel senu d'una familia burguesa qu'emigró a Barcelona cuando él yera entá un neñu, magar lo cual siempres caltuvóse en contactu cola so localidá natal. En 1903 empezó la carrera de Derechu na Universidá de Barcelona, impulsáu pol deséu paternu de que ganara una notaría. Más tarde matriculóse na Facultá de Lletres, la so verdadera vocación. Vivió unos meses en Madrid, onde se doctoró en 1908. Ellí tuvo la oportunidá de tratar a diverses figures de la dómina, como Bonilla y San Martín –el so queríu maestru–, Ramón y Cajal, Luis Simarro, Unamuno, Galdós y Valle-Inclán.

Empecipió la so carrera periodística en La Veu de Catalunya, la revista de la Lliga Regionalista. En 1911 empezó a trabayar nel Institut d'Estudis Catalans, fundáu poco antes por Prat de la Riba. Na capital francesa, onde se treslladara p'afondar les sos conocencies, vivió l'españíu de la Gran Guerra, sobre lo cual dio bona cuenta nes sos cróniques pa La Veu. Estos trabayos nun gustaron a Prat de la Riba (que dirixía La Veu) y sí, sicasí, a Miquel dels Sants Oliver, que daquella yera inda collaborador col periódicu de la Lliga. Esto llevó a Gaziel a incorporase a La Vanguardia pa escribir sobre'l París de la Primer Guerra Mundial. Los sos cróniques sobre la guerra fueron bien lleíes en toa España y consagráron-y como periodista. Dende entós y hasta 1953, utilizó casi puramente'l castellán, lo que-y valió non poques crítiques per parte de los sectores más catalanistes. Nel diariu barcelonés, que mientres la República aportó a unu de los que tenía más tirada de toa España, trescurrió bona parte de la so carrera periodística ya inclusive llegó a dirixir el diariu ente 1920 y 1936. Nesa dómina convertióse nel periodista políticu más almiráu y nel líder d'opinión de la burguesía lliberal y democrático, que yera'l públicu natural de La Vanguardia.

Al españar la Guerra Civil, exilióse. So ye la frase: "Si de la República han de tar ausentes les dereches, cuando manden les esquierdes, y depués, cuando son les dereches les que gobiernen, les esquierdes han d'alloriar y llanzase a la revolución, nun va haber, nun hubo inda, verdadera democracia n'España. Como tantes otres coses, la democracia equí nun ye más qu'un nome de raigaños clásicos y de conteníu estranxero". Tornó a España en 1940, apuráu pol'avance nazi n'Europa. Foi procesáu y absueltu poles autoridaes franquistes. Establecióse en Madrid, y empezó a escribir en catalán llibros de memories y de viaxes. Yá septuaxenariu, tornó a Barcelona onde retomó con entusiasmu la escritura na so llingua materna, tratando de reconciliase col catalanismu de la so mocedá.

Republicanu íntegru y de talante moderao, laicu y demócrata, amigu de la so tierra y la so llingua, más federalista que nacionalista, morrió a la edá de 77 años y dexó un legáu lliterariu formáu por ocho llibros en castellán y catorce en catalán. Josep Benet, nel prólogu a la Obra Catalana Completa (1970) que publicó póstumamente la Editorial Selecta, valoró asina la so contribución: «Probablemente foi l'escritor políticu más intelixente que dio la derecha catalana nesti sieglu». Pa munchos ye consideráu'l primer periodista "modernu" del estáu español, y el primeru en dar una óptica internacional a los sos escritos.

Ye autor de la frase: «Nun van ser les voluntaes de los homes sinón les lleis de la Hestoria les que van alteriar l'actual estructura de la Península Ibérica; la meyor forma de producise esa evolución va ser dientro d'una Europa xunida».

Pessoa y la civilización ibérica

"Na península hispánica, d'un llau a otru, nós nun somos llatinos, somos ibéricos. Ye precisu basase nesto, primero que en cualesquier otra cosa. Nada tenemos de mancomún, psicolóxicamente, colos dos países herederos de la civilización llatina puramente dicha — Italia y Francia. Nós nun somos llatinos, somos ibéricos. Tenemos — españoles y portugueses — una mentalidá a parte del restu d'Europa. Por más diferencies que nos dixebren ( y éstes verdaderamente esisten) tamos más próximos psíquicamente los unos de los otros, de lo que cualesquier de nós de cualesquier otru pueblo extra-ibéricu. Dixéronse coses como que nós los portugueses somos más paecíos a los franceses, o a los italianos, que a los españoles; felizmente nun ye verdá".

(Compilación de testos pa la película "Mensagem")

"Nós, ibéricos, somos un encruz de dos civilizaciones — la romana y l'árabe. En Francia y n'Alemaña la civilización romana esiste superpuesta al fondu orixinal, ensin otru influxu *civilizacional. Somos, por eso, mas complexos y fecundos, por naturaleza, que Francia o Alemaña, [...]"

("Problema Ibérico")

"Iberia
Separaos, vamos tener, cada unu de nós, un sentíu nacional;nun tenemos sentíu civilizacional. Vamos poder esistir más o menos digna y decentemente, como cualesquier Bélxica o cualesquier Suiza, pero eso nun ye esistencia digna a la que pueda aspirase. Valimos más qu'eso; tenemos derechu a faer más qu'esistir."

("Sentido nacional e sentido civilizacional: a Civilização Ibérica")

"Si somos ibéricos, tenemos derechu a esperar que tou tien de tender escontra una política ibérica, escontra una civilización ibérica que, común a los países que componen Iberia, a toos, sicasí, tescienda (tescienda a cada unu d'ellos individualmente).

("A síntese cultural ibérica")

"Puestu, pos, que tien de tendese escontra dalguna unidá ibérica, coles mesmes establezse qu'esa unidá tien de tar constituyida por pueblos lo más diverxentes posible dientro d'esa unidá. Sume por tanto, por absurda, por ibéricamente criminal, tola tentativa que quiera esbozase d'absorción d'un país por otru, como criminal resulta, tamién poro, l'absorción (ficticia, de fechu) de la nación catalana per Castiella. Porque llegamos finalmente a la visión integral de la confederación ibérica".

("Problema Ibérico")

Sinibald de Mas

Introduzco equí a una de les grandes figures de l'Iberismu: Sinibald de Mas i Sans (1809-1868). Sinólogu, pintor, calígrafu, escritor, embaxador, aventureru ya intelectual iberista español, y unos de los pioneros de la fotografía.

Discípulu de Pablo Alabern en Barcelona, presentó a les Cortes en 1821 unes pruebes práctiques de caligrafía. Estudió idiomes, de los que llegó a conocer unos veinti, según tamién física. Tradució l'Eneida de Virxíliu n'hexámetros castellanos. Foi un bon pintor; caltiénense les sos semeyes de Manuel de Cabanyes y de Joaquim Roca i Cornet, realizaos escontra 1830. En 1831 publicó en Barcelona Veinticuatro poemas líricos y Aristodemo, una traxedia en versu na qu'intentó exercer un interesante y peculiar sistema de métrica, que describió nel so ensayu Sistema musical de la lengua castellana (Barcelona, 1832). Tamién inventó un idioma universal. Protexíu por Remisa, collaboró n'El Vapor hasta mediaos de 1834. Encamentáu por Félix Torres Amat llogró la protección de Cea Bermúdez, Francisco Martínez de la Rosa y Javier de Burgos por que se-y nomara traductor encargáu de viaxar pol Oriente con comisión de recoyer notícies y documentos literarios y estadísticos, de política, comerciu y de too xéneru que pudieren importar a los intereses y glorias nacionales.

La so aventura viaxera, empecipiada en 1834, llevólu de Marsella a Constantinopla, onde contraxo amistá col ilustráu orientalista López de Córdoba, y hasta 1838 en que llegó a Calcuta, pasó pol Llíbano, Palestina, Exiptu, Arabia y Persia. En Bengala fixo dalgunos de los primeres darregotipos conocíos de la rexón. Como la so paga tardaba en venir, instalóse en Manila, viviendo de la so habilidá como retratista y de la caridá del padre Manuel Bueno, que-y tuvo agospiáu na so celda cinco meses. A la so vuelta a Madrid en 1842 publicó Informe sobre el estado de las islas Filipinas, primero n'edición confidencial de 1842 y después en pública, en 1843; como defendía la independencia del archipiélagu, él mesmu censuró la parte que nun-y gustó al gobiernu. Establecú en Macao en 1844, publicó L'Ideographie, 1844, y en Manila el so Pot-pourri lliterariu (1845), dedicáu a Torres Amat. Collaboró en El Renacimiento de Madrid (1847). Nesi mesmu añu foi designáu como primer embaxador español en China; llegara a ella per vegada primera cuando tenía 34 años. Llogró la representación y see diplomática en Pekín cuando namá Francia, Gran Bretaña y EE. UU. conseguieren la acreditación del emperador manchú, bien ronciegu a la penetración occidental, y el so amigu José de Aguilar, quien llegaría a ser tamién un gran sinólogu, llogró'l consuláu de Hong Kong en 1848 con residencia en Macao.

Vueltu a Madrid en 1851, ente les sos obres d'ensayu políticu destaca, al calor del movimientu pro "Unión Ibérica", La Iberia. Memoria sobre la conveniencia de la unión pacífica y legal de Portugal y España. Esta obra foi publicada por primer veegada en Lisboa en 1851; Latino Coelho traducíu-la al portugués en 1852. Foi ben reimpresa tantu nesta mesma ciudá como en Madrid. La obra intentaba, según Rocamora, demostrar "les ventayas polítiques, económiques y sociales de la unión de los dos monarquíes peninsulares nuna sola nación". Puede considerarse-y como manifestación de los intereses económicos de la burguesía peninsular, que, en competencia con Francia ya Inglaterra, quería ampliar el so mercado. L'escudu de la nueva nación yera'l de España y Portugal xuníos, y la bandera constaba de cuatro colories: blancu, azul, colloráu y mariellu. En 1853 reimprimióse en Madrid coles mesmes que les sos Obras literarias. Foi condecoráu cola Orde de Carlos III.

De Mas escribió tamién L'Angleterre, la Chine et l'Inde, París, 1857, y La Chine et les puissances chrétiennes, París, 1861, llibros bien documentaos qu'encamienten aumentar el comerciu y estremar China pa la so meyor esplotación comercial pelos países europeos. Volviendo a la so afición pola caligrafía, publicó en París Cartilla, 1858 y, en collaboración con Jerónimo Canals, Arte de escribir en letra española, 1860; con W. Norriat escribió Arte de escribir letra inglesa, 1860. Manuel Ovilo y Otero escribe tamién que ye autor de Colección de despachos diplomáticos. Son les sos comunicaciones empobinaes al gobiernu. La primera trata sobre Grecia; otra sobre Suez; otra de Moka; otra de Calcuta. Tamién d'una Noticia estadística y mercantil de Shanghay, de Ningpó, de Intérprete del viajero en Oriente, de Estado de las islas Filipinas, 1845 y de Memoria sobre las rentas públicas de Filipinas y los medios de aumentarlas.